नेपाल तामाङ घेदुङद्वारा जारी प्रेस विज्ञप्ति

हाम्रो दंसिंग आनलाईन खबर पत्रिका  
मिति ः २०७१÷०५÷०३


नेपाल तामाङ घेदुङद्वारा जारी प्रेस विज्ञप्ति
गत साउन २९ गते अपरान्ह ३ बजे गोर्खाको सिमजुङ गाविस वडा नं. ६ मा भएको घटनामा गोली लागी घाइते हुनुभएका ६५ वर्षका स्थानीय लाक्पा तामाङको उपचारको क्रममा काठमाडौंको वीर अस्पतालमा भदौ २ गते निधन भएको खबरप्रति हाम्रो गम्भीर ध्यानाकर्षण भएको छ । गोरुको मासु काटी खाएको आरोपमा सादा पोशाकमा गाउँलेलाई गिरफ्तार गर्न पुगेका प्रहरीहरूसँग भएको झडपमा संलग्न नभएको र घरको आँगनमा बसी काम गरिरहेको बेला विना चेतावनी प्रहरीले गोली चलाउँदा उहाँ घाइते हुनुभएको देखिएकोले प्रहरीको चरम लापरवाही देखिन्छ । प्रहरी प्रशासनबाट भएको यो ज्यादतीको हामी निन्दा र भत्र्सना गर्दछौं ।
प्रहरीको लापरवाहीले गर्दा एकजना निर्दोष नागरिकको अनाहकमा ज्यान गएकोले घटनाको सम्पूर्ण जिम्मेवारी प्रशासनले लिँदै गोली चलाउने प्रहरी र आदेश दिने स्थानीय प्रशासकलाई तत्काल निलम्बन गरी कानुनी कारवाहीका लागि प्रक्रिया अगाडि बढाउन, मृतकको शव दाह संस्कारका लागि गोरखामा पु¥याउन हेलिकप्टरको व्यवस्था गर्न र पीडित परिवारलाई तत्काल उचित क्षतिपूर्ति उपलब्ध गर्न हामी सरकारसँग जोड्दार माग गर्दछौं । 

यसैगरी तामाङलगायत नेपालको विभिन्न समुदायले परम्परागत रुपमा गाई÷गोरुको मासु खाने प्रचलन रहेको र अन्तरिम संविधान २०६३ ले समेत धर्मनिरपेक्ष राज्य घोषणा गरिसकेकोले सो भावनासँग बाझिएका मुलुकी ऐनका सबै महल र दफा यथाशीघ्र संशोधनका लागि सार्वजनिक प्रतिवद्धता जनाउन नेपाल सरकारसँग माग गर्दछौं ।
मुलुकमा लोकतन्त्र र धर्मनिरपेक्षता स्थापित भइसकेपछि पनि अझै गाईगोरुको मासु खाएको नाममा देशका विभिन्न भागमा सिंगै समुदायलाई आतङ्कित पार्ने तथा जनतालाई स्थानीय प्रशासनबाट अनावश्यक रूपमा दुःख दिने यस्ता काम अविलम्ब बन्द गर्न पनि नेपाल तामाङ घेदुङ हार्दिक अपिल गर्दछ । अन्यथा, त्यसको परिणाम गम्भीर हुन सक्नेतर्फ पनि सचेत गराउँदछौं ।

......................
प्रतिक ङेसुर तामाङ
केन्द्रीय सचिव
केन्द्रीय कार्यालय, काठमाडौ