“सबैले मलाई तिम्रो स्वर राम्रो छ । तिमी गीत गाउन सक्छौ, भन्थे । म पनि गीत गाउन भनेपछि हुरुक्कै भएर लाग्थेँ” गायिका रमला पाख्रीनले आफ्नो विगत सुनाउँदै भनिन्, “यो क्षेत्रमा लागेर केही गर्ने रहर मनभित्र थियो । निरन्तर लागिरहेँ । आज आफ्नो परिचय बनाउन सफल भएँ जस्तो लाग्छ ।”
हुन त रमलाले खुल्लारूपमा गीत सङ्गीतमा पाइला टेकेको १३ वर्ष भइसकेको छ । २०५८ सालतिर म्हेन्दोमाया युवा क्लबले म्हेन्दोमाया गीति एलवम निकाल्दाखेरि आफूले अवसर पाएको उनी सुनाउँछिन् । “गीत गाउने रहर त थियो नै, तर एलवममै गीत गाएपछि हिम्मत बढ्यो । मैले त्यतिखेर दुईटा एकल गीत गाएकी थिएँ । यसले मलाई ठूलो हौसला मिल्यो” रमलाले विगतका दिनहरूको सम्झना गरिन् ।
त्यही वर्षको सेरोफेरोमा राष्ट्रिय सभागृहमा भएको “फुलबारी सांस्कृतिक कार्यक्रममा योगिता मोक्तानलगायतसँग गीत गाउन पाउँदा थप उत्साहित भएको उनले बताइन् । यसले गीत सङ्गीतको क्षेत्रमा यात्रा अघि बढाउन उत्साह थपेको उनको भनाइ छ ।
रमलालाई सांस्कृतिक कार्यक्रमहरू असाध्यै मन पथ्र्यो । विद्यालयमा हुने हरेक सांस्कृतिक कार्यक्रमहरूमा उनी सहभागी हुन्थिन् । “आज त तिमीले निकै राम्रो गायौ नि” साथीहरूको प्रतिक्रिया सुनेर उनी दङ्ग पर्थिन् । उनको प्रतिभाबाट प्रभावित भएर सबैले उनलाई स्याबासी दिन्थे । “दसैं तिहारमा हुने सांस्कृतिक कार्यक्रम, अभिभावक दिवसमा मेरो सहभागिता अनिवार्य जस्तै हुन्थ्यो” रमलाले पुरानो सम्झना सुनाइन् ।
१३ वर्षको साङ्गीतिक यात्राको क्रममा रमलाले आफ्नो श्रोता तथा दर्शकलाई करियर र रमला नामको दुई वटा एलवम कोसेली स्वरुप ल्याइसकेकी छन् । “यी दुईटा एलवमले मलाई चिनाउन र साङ्गीतिक क्षेत्रमा अघि बढ्न राम्रो आधार प्रदान ग¥यो” रमला भन्छिन्, “श्रोताको मायाले गर्दा यो क्षेत्र छाड्न सक्दिन होला ।” पूर्ण रूपमा गीत सङ्गीतको फाँटमा होमिएकी रमलाले अहिलेसम्ममा सबै खालका गरी दुई सयभन्दा बढी गीतहरूमा आफ्नो स्वर दिइसकेकी छन् ।
अहिले पनि उनी विभिन्न एलवमहरूमा गीत गाउन व्यस्त छिन् । तत्काल नयाँ एलवम ल्याउने सोच नभए पनि हरेक दिन जस्तो गीतका लागि अफर आइरहेकोले उनलाई फुर्सद छैन ।
धादिङ, नुवाकोट, रसुवालगायत पश्चिमी जिल्लाका तामाङ गीत र लयहरू अझै सोचेजति आउन नसकेको रमलाको पनि बुझाइ छ । पहिले पहिलेभन्दा बिस्तारै आउने क्रम बढ्दो छ । तै पनि मिडियामा ठाउँ पाउन सकेको छैन । वास्तवमा पश्चिमका म्हेन्दोमाया गीतहरू तामाङ संस्कृतिकै एउटा अभिन्न पाटो हो । यो वास्तविकतालाई चिनाउन अहिले पश्चिमका कलाकारहरू लागिरहेका छन् । आफू पनि त्यही अभियानको एकजना पात्र रहेको उनी बताउँछिन् ।
कतिपय अवस्थामा अस्वस्थ प्रतिस्पर्धाले गर्दा समय र खर्चको सँगसँगै गीत सङ्गीतको गुणस्तर घटाउने काम भइरहेको उनको टिप्पणी छ । अब कस्तो गीत सङ्गीत गुणस्तरको भन्ने नै प्रश्न चिन्ह उठिसकेको उनको बुझाइ छ ।
धादिङ सत्यदेवी गाविसमा जन्मिएकी गायिका रमलाले साङ्गीतिक यात्राको क्रममा नेपालका बारा, काभ्रे, लमजुङ, रसुवा, नुवाकोट लगायतका जिल्लाहरूमा मात्र नभएर संयुक्त अरब इमिरेट्स् (युएई) को दुबई र कुवेतमा समेत आफ्नो प्रतिभा प्रस्तुत गरिसकेकी छन् । उनको साङ्गीतिक यात्रा सफल रहोस्, शुभकामना ।
साभार by प्रतिक तामांग www.chhargongma.com
0 comments:
Post a Comment